Amalal weqbar

Katalunya ghas ijj n tracca tameqrant n isghulaf idelsanen d ighrimen mani iwd'an d timesmunin teggen irmad ennegh. Axedjed n isghulaf netta ghas ccan: ilemmasen ighrimen (centres cívics), timekradiyin, isulay, ilemmasen uzuwan, ilemmasen idelsanen, ixxamen userhu nigh timesmunin tidelsanin (ateneus), tiri xassent tideblin tizuyaz nigh timesmunin timezlayin.

Akwad gha marra imucan-a izuyaz netta d arelli u yazem i marra dunect di tiseâatin d iddaden usexdem i yeqqa kur alemmas, cnaw aggez nigh aweqar n erxedmet n timesmunin d iwd'an neghnit. Trah'it gha irmad ighasen ilemmasen-a netta d ijj webrid d asebh'an mah'enda anessen Katalunya, anegg iseghnasen wettaf di timetti-ya.

Ilemmasen ighrimen d ixxamen userhu n iâzuray d timgharin nigh timesmunin tidelsanin nihni d tizzat taghermit issegwara Axxam n tghiwant di ca igherfan, deg inneghnit, seggwarantent jar timesmunin d Axxam n tghiwant.

Deg imucan-a attas n timesmunin itiri ghasent tissi ensent , ghasent attas n talghut x tighbula n tghiwant mani nzeddegh d irmad, ismahalen, timeghriwin, isiharen, isaragen, imsawaren, saharat, iwesanen, atg. Icten zi timezra ithimman attas n imucan-a netta d anhil itirin s isumar n timesmunin d n tiqqermi, uca yammu, nettat d ijj n tarmit tasebh'ant ucaci agherman. Zati tadart ennegh tiri ghanegh ijj ulemmas aghrim nigh adelsan mani nzemma anar x iqedjiqen idelsanen d ighermiyen.

Isensan n timesmunin (hotels d'entitats) nihni d isghulaf iticcen aâemmed i timesmunin bera anekwi n arrbeh' s ibriden mxedjafen umedhel: tâawanenten adawden gha issedjih'en i taneflit ennes, ticcen ijj useghnes jar imesmunen u tâawanen gha wexraq n uddusen. Zemma aghasen awdent ghi timesmunin ixerqent s usad'uf deg aggez ennes u tiri ghasent taggara tighrimin d timettiyin.