Marra iwd'an izeddghen deg ijj n taghiwant ghanegh addad wajja nigh n tajjat, manaya itawyanegh anegg ca izerfan d ughiren s wexza gha jjiran neghnit. Nihni d inamiten d ilugan iticcen ijj n taghar n tudart tasebh'ant tmars x tamâacat jar iwd'an d amuni ametti.
Tamâacat (convivència) n jjiran tmarsa x azalen cnaw tamsetla, aweqqa, amnus n marra d tamâawent. Alaghmu n azalen-a iteshir ah'essi n tarbih't u adanegh h'esben ijjen zayes. Nihni cnaw tissi n aneghrum (civisme), manaya nfehmit cnaw aggay n tifrazin (isarrifen) itejjan ighermanen d tighermanin adzedghen di tarbih't, u rebda s aweqqa d aqbar n ilugan n tugdut d izerfan imezwura. Alaghmu n tamâacat d uneghrum netta itekkad i marra iwd'an izeddghen deg ijj n taghiwant, cnaw mamec yenna Zygmunt Bauman: “Wa tzemma atiri ijj n tarbih't bera ijj unamek d tarirt n wemnus”.
Arami kur timetti ghas iseghnasen imettiyen ennes, di taseddart-a anessiwer ghi x ilugan ikatalanen itlugan tamâacat taghermant s isentalen ennes, zi tarbih'in n jjiran ar aweqqa n isaway agaman, s uâettu x imucan izuyaz.
Ammu, tudart di timetti ghas izerfan d ughiren ennes. Mara nesniten uca nteggit adanegh âawnen gha useghnes d umâaci ak jjiran neghnit, aghanegh tiri ijj n taghara n tudart tasebh'ant i marra itnegh.
D ahemmi d ameqran anecceni ih'enjan tbayeâ d inamiten n “tajirant tasebh'ant”, mah'enda anedmen tamâacat n ass-a d n tiwecca. Yemmaten d babaten ghanegh amnus n min teggen tarwanegh x uyenni neccin ixessa asennuc amedyata aneh'dam min teggen di tadart nigh barra deg imucan izuyaz.