Amalal weqbar

Zenqet d tarbih't n jjiran nihni d imucan ussiwer d useghnes jar marra iwd'an. Taghd'uft x lmacakil d ih'dijen n jjiran neghnit u mara rebda itiri aweqqa jar iwd'an, manaya yekmer itâawan gha tamâacat. Amedyata, ixessa anxemmem u anâawen jjiran i yemghan attas izedghen weh'edsen, ura di timgharin s iâeddisen, d yewd'an d unqisen nigh deg ih'enjan.

Tarbih'in n jjiran d tijirarin
(Comunitats de veïns i veïnes)

Marra iwd'an enni nzeddegh nigh nxeddem deg ijj n erfuqi (cnaw imzenziyen) neccin d imeggan n tarbih't n jjiran (comunitat de veïns) ughir xanegh anweqqa ca n ilugan usarref n tabiyet tasebh'ant u tiri aqayent deg ilugan ighiwanen (ordenances municipals).
Ixessa anawi h'ad'a ak timegga n kur ass i zemmant adsedâent jjiran, amedyata cnaw:

• Wa nfessa yarrud' bera watenzem nigh anezzerz ijatar swas.

• Wa ntejji ruh'uc n taddart adsedâen nigh adwesxen erqec ucaci n marra erfuqi.

• Anessu plantat zi âecra n djiret sennej.

• Anegg erbar isdeâ (kta mara jar 10 n djiret d 8 n sbeh'), ixessa wa ntegg sdeâ enni ntwara adiseddeâ azyenfi n jjiran. Amedyata: ssut n isiwiren (ighuyan), n azawan nigh n tilivizyun, wa nessighi macinat n trisinti cnaw tasebbant nigh tamedwast n trisinti, wa ntebeddir erqec zeg umcan, wa ntegg iâeddiren di taddart nigh anejj ruh'uc ennegh di erpatyawat, tizeqqa, iseqfan nigh deg ibarkunen gha tameddit.

• U kta i marra manaya ixessa anuc erbar ennegh i ddriz xmi ntegg ijj umerqi n tarrawt nigh ijj wura.

Xmi nzeddegh deg ijj n erfuqi n pisawat ncarrec ak jjiran d tijirarin neghnit di ca imucan icacen (espais comuns) (isunan, isettih'en usinen, axerd'us, ipasiyuten, tazeqqa, aghgummi, atg.) i di wa nzemma anejj reh'wayej, nigh atennesexdem cnaw imucan imezlayen, i manaya dinni imucan itirin d ihriyen nigh d ermasawat. Âawed, ixessa rebda antcawa Aghraw n tarbih't n ayetbab n tiddura (Junta de la comunitat de propietaris) x manten ma tiggit i tawyen ca ubedder deg imucan icacen, cnaw i wakkab n parabulat, nteh'daja aqebber ennes.

D asebh'an ancac ura di timesmunin n jjiran (associacions de veïns) n agmam ennegh, anah' gha igensasen ennes mah'enda adanegh ucen talghut x ighd'ufen n tajirant d irmad iteggen u, mara d axessi, mah'enda adanegh ucen aâemmed di timetta ennegh qibar i tisuda: ixxamen n tghiwant, timunin n igewamen (companyies de subministrament), atg. Tansa n tamesmunt n jjiran izemma adanegh tyuc ca n ajjar neghnit nigh assedjih' n talghut n Axxam n tghiwant ennegh.