Amalal weqbar

Arami neccin d jjiran ixessa ancac di cghurat uh'ettu n erfuqi:

• Ayetbab n tiddura d yenni icarran ughir xasen adeh'd'an pisu nigh adigan ensen.

• Tarbih't n ayetbab n tiddura kur assegwas tegg ijj n tasmekta n temenyat n arrisibu n tarbih't (rebut de la comunitat), nihenti d temenyat itxeddasen (attas iman itiri kur char) ayetbab n tiddura nigh inni icarran, i uh'ettu (adiyeâ n erqec, tfawt, abedder n bumbiyat, sighuru, asinsur, atg.) d tazdugi n erfuqi. Mara tugha ncarra ijj n tazeddixt gha ijj lbiru usemsar, ixessa di kuntratu n recra (contracte de lloguer) adyiri yura ma di tasmekta n recra yud'ef dayes ura d axeddes n arrisibu n tarbih't nigh ixessa atenxeddes.

Mara kuntratu n recra wa yeqqa ca ma tixessura-ya antixeddes wenni icarran, rexdenni antixeddes bab n taddart. Maca, di kuntratu ixessa adayes nari amsetfeq-a i zi wenni icarran netta i gha ixeddsen tixessura-ya, ixessa adyiri yura di kuntratu n recra, âawed ixessa adayes yiri yura tasmekta ussegwas n tixessura. Mara wa nkemmer ak marra corot-a, wenni idanegh itcarran wa izemma adixeddes tixessura zi wenni icarran.

• Ixessa ancac di tazdugi n imucan ucaci. Di ca n izedughen jjiran ntegg imaren mah'enda anegg tazdugi, nigh tarbih't tkuntrata ijj n benadem mah'enda adyegg cgher-a. Axeddes-a izemma atyegg aselway n tarbih't n jjiran nigh s anedbal n wagra (administrador de finques) simantennes di arrisibu n tarbih't n jjiran.

Di ca n izeddughen ghasen aâessas nigh taâessast, netta d benadem enni itirin x tazdugi, ghas remfateh' ubedder u itiri x timesrayin neghnit n marra jjiran. Assedjih'-a txeddasent jar marra jjiran, attas iman tarint di arrisibu n recra (rebut de lloguer).

• Ixessa aneârem i aselway n tarbih't n jjiran mara ntwara ca n tazzect, ighumiten nigh ca n driz.

• Ixessa anuc erbar ennegh i uh'ettu n ighembab n izeddighen d imuren neghnit n erfuqi iditbanen zi zenqet, amedyata cnaw ud'ufen, lintirnat nigh isenfa. X manaya wa nzemma anefsa arrud' di rekwazi nigh ibarkunen ixezzan gha zenqet.

• Jjiran d tijirarin ixessa anâawen gha ah'ettu n marra reh'wayej i di ncarec (asinsur, aâessas aliktrunik, akkab n tilivizyun, azur nigh tazeqqa, tracca usufegh waman nigh ighembab n izeddughen), maca wa nzemma atenh'ada mah'enda ateneâd'er. Âedrenten ghi itiknisiyen n tirmisin imezzagen itkuntrata tarbih't n jjiran.

• Mara idiyeâ ca n erh'ajet i di carcen marra (amedyata di remrah' nigh di tazeqqa), waxxa iddarra ghi ijj wajja, amnus i tiri n marra, mara itnegh ixessa anaf ijj n tarezmit u marra ayetbab n tiddura anxeddes tasekwit weâd'ar.

• Ughir aghanegh irint ca n temenyat n tarbih't nigh temenyat n arid (fons comunitari o fons de reserva) i uh'ettu n erfuqi. Temenyat-a d amnus n ayetbab n tiddura, maci n yenni icarran. Temenyat n arid ineffeâ ghi ixeddisen n tixessura uh'ettu d weâd'ar n erfuqi, ixessa ankuntrata ijj n sighuru i userqi n idarriten n erfuqi u anegg ijj n kuntratu uqaber n erfuqi d n tiglin ennes. Nesxeddamitent ura mah'enda anxeddes ingharen (derrames) n tarbih't n jjiran.

• D ahimi attas, tarbih't atkuntrata ijj n sighuru userqi x id'arriyen itewqiâen s usad'ef nigh igmawiyen d tucefra.

Min itirin x rebni
(Pel que fa a les obres)

• Tarbih't n ayetbab n tiddura ughir xas ategg rebni itxessan mah'enda adyed'men ijj n uh'ettu n izdughen.

• Qber i gha negg ca n rebni deg azeddugh ennegh, ixessa adastnini i aselway n tarbih't n jjiran d Axxam n tghiwant, mani gha netta ijj n tesrih' n rebni amezyan (llicència d'obra menor) nigh tesrih' n rebni ameqran (llicència d'obra major).

• Xmi itxessa anegg ijj n rebni di erfuqi nigh deg ijj n tazeddixt, ixessa rebda antetta inessih'en n ijj n tiknisyen u aghanegh tirint tesrih'at itxessan i wed'man ukemmer n aslagan i yedjan, taghellist d taghara n rebni.