Amalal weqbar

Amxedjef n timesmunin (associacions) (timesmunin n jjiran, n iâzuray, n timgharin, n iwessura, n imhajan, n addalen, n tadalsa, n isadaren, inmula, n tamsetla, n imzenziyen d imsudar...) netta d aseccen n agra d asagat n timetti.

Di taseddart-a anessiwer ghi x timesmunin bera anekwi n arrbeh' (associacions sense ànim de lucre), traghanasent ura timesmunin maci n anabad (organitzacions no governamentals, ONG), nihenti tinni i texsent adxedment i timetti wa nekwint ca arrbeh' n temenyat i icricen ennes, mayemmi irmad ensent temrasant x issekwiyen n tamsetla d amedhel bera ca unekwi n arrbeh'.

Mah'enda anesnem x Asad'uf n timesmunin akatalan nzemma anexzam di:
http://justicia.gencat.cat/ca/departament/legislacio/entitats_juridiques/associacions

Acaci di timesmunin-a itejayanegh anessiwer x ih'essifen ennegh u itâawananegh gha umâaci. Netta ura d ijj webrid mah'enda anani di marra timetti takatalant.

Timesmunin timettiyin (timesmunin), farrqent ak ineghnit taghduft n marra udmawen n ijj n tarbih't n yewd'an, nihenti ticcent talghut, senhezant u dafaâent x izerfan n icricen qibar i tisuda ensent, waxxa nihenti tirint d tizuyaz nigh d timezlayin.

Zi rebda Katalunya tbaned x ucaci n igherman d tighermanin di attas n timesmunin, nexs anini, di erweqt d icten nzemma aniri d icricen n Tamesmunt n babaten d yemmaten imeh'dan (associació de pares i mares d'alumnes, AMPA) ugherbaz n tarwa d isitnegh, n tamesmunt n jjiran (associació de veïns) n agman ennegh nigh n ijj n tamesmunt tasadrit nigh tametti.

Uca yammu, iwd'an beh'ra direh'gen ghanegh azref mah'enda aneggem timesmunin ennegh i tudsa tanbazit mah'enda anescen tadelsa ennegh, andafeâ izerfan ennegh u mah'enda aneggem isumar i zi gha anh'essen iddaden n tudart weghref ihajan. Netta d ijj unesseh' ancac di marra tazettat usmuni (teixit associatiu), mayemmi netta isbiyaned tefsiret n rexxu n weghref akatalan u adiâawen mah'enda timesmunin neghnit adeksint ura d amxedjef n regnusat i yedjan ass-a di Katalunya. 
 
Ibriden ucaci di timesmunin nihni d attas itsen: cnaw amecric, cnaw asadar nigh cnaw amghzal (voluntari).

Mah'enda anessen mamec gha niri d imeghzalen deg ijj n tamesmunt nigh deg ijj ussedjih' agherman d ibriden ucaci nzemma anexza di Traca Umesmun d Umeghzal n Katalunya (Xarxa Associativa i de Voluntariat de Catalunya):
http://www.xarxanet.org

Timesmunin n ijj usentel kif kif nigh taseqqart n tiggawt zemmant admunent adnedment jarasent deg ijj uddus (federació), manaya itic ijj n tizemma temgha wexdam d ugenses qibar i tideblin tizuyaz d timetti deg umatu. Di kur taseddart adayes nari ismawen n uddusen iked nedja.

Ura yammu, mara nexs anessen x wagra n timesmunin n taghiwant mani nzeddegh nzemma anah'em gha Axxam n tghiwant, danita adanegh ucen talghut u adanegh nesh'en x issurifen i gha negg mah'enda anxerqem ijj n tamesmunt.