Amalal weqbar

Qber i ghansegh ijj n tazeddixt tbarect, ixessa anexza ma aqet mlih', mah' enda wa ghanegh tirin ixbumbiren.

Man isefraken ixessa anegg qber i gha nuc awar i tamesghiwt:

• Anesseqsa di Aggez Wagra (Registre de la Propietat) (www.registradores.org) n tandit ennegh x erh'ar i di tedja tazeddixt-a deg asaduf.

• Anetta ijj n arcem ah'erfi (Nota simple). Netta cnaw tameddurt n pisu u dayes yura assegwas i tebnan, rwesfet ennes, mara aqqet bera reh'mairet (Lliure de càrregues) nigh aqqet saddu imbessifen (Servituds) nigh ughirat i umi xessa atesba.

• Anetta ijj n arcem x min wa ixeddsen x taddart. Nettat tessawar x mamec tedja tadart gha erbanku: timersa iqqiment, imawassa id'emnen pisu nigh ca n reh'mairet neghnit i xef gha nessebbeb ak bab necci qber i gha tensegh.

• Isexsaren innuffan (Vicis ocults): Bab necci ixessa ad'islek bil.la pisu wa ghas bu isexsaren nuffan, nihni, d id'iyaâen i wa ntwiri gha umezwa u zemman adesexsan rebni n tadart.

• Izuyar n tarbih't (Estatuts de la comunitat): Qber i gha nezmel tamesghiwt n ijj n pisu ixessa anetta i bab necci nigh i usemsar n tadart ijj n kupya n izuyar n tarbih't. Dinni tiddura wa ghassent ca.

• Tira n ighrawen n bab neccit (Actes de les juntes de propietaris) n erfuqi: Ixessa asemsar adanegh tyuc. Nettat d ijj n kupya n mixef siwren deg imunan inneggura n bab neccit, adanegh yenfeâ mah'enda anessen ma msetfaqen adeggen asinsur, adeggen ca n taxessat nigh adâed'ren tazeqqa, reh'wayej-a tawyen ca n tixessura neghnit. Di tira n imunen daysen ura d tasmekta itxeddas kur ajjar x tixessura n tarbih't.

• Tiwsi wagra n tudrin: Ixessa anetta i bab necci arrisibu aneggaru mah'enda anessen tasmekta i gha ntexeddas kur assegwas ura mah'enda anessen ma dinni arrisibut âad wa xedsen.

• Ixeddusa i tarbih't: Ixessa anetta i usemsar recwaghed ineggura n ixeddusa i yegga bab necci mah'enda anessen ma yeqqim ca n tasmekta wa txeddes.

Mara neccin nexs anegg manaya weh'ed'negh h'sen ancarred' erxedmet n ijjen tiri issen deg usentel n tiddura (cnaw: ijj n ermuhendiz nigh ermuhendiz d amâedjem) mah'enda adanegh yegg ijj uâarred' n pisu ura mah'enda adanegh yenseh' di tasekwit i danegh tettan. Aâarred'-a izemma adanegh yeswa ca n 150-200 €, maca nesh'ikenniw atteggem, mayemmi gha unegga nzemma anesbeh' di attas n tixessura.

Agherbaz n Imh'ettan n rebni d Ermuhendizat Imâedjamen n Barsiluna (www.apabcn.cat) ghas ijj ussedjeh' uqaber umezdagh iteggen ijjen tiri yessen mah'enda adyegg erxedmet-a. Djjant ura d Timesmunin maci n ermexzen (ONG) nigh timesmuna neghnit itticcen nican anesseh'-a.