Amalal weqbar

Xmi tiri nexs ansegh ijj n tazeddixt u tiri nekkes di taman ak usemsar nigh ak bab necci ixessa anegg timesrayin-a:

1. Anetta recwaghed-a:

1.2. Futukupya n tira n tadart (Escriptura de la propietat) d arcem ah'erfi aneggaru d uttun n tiggezt n tazeddixt (Cadastre)
1.3. Tawriqt uzeddigh
1.4. Izuyar n tarbih't n izeddagh (mara aqqayen ghas) d aqqessi yura umuni aneggaru n bab neccit
1.5. Tasekkwit n marra tazeddixt d talghiwin uxeddes d marra ccorot
1.6. Talghut n tamrist mara atemsebeddar
1.7. Arrisibu aneggaru n dariba n igerwan n tudrin
1.8. Aselkiw uselleb d reh'mer, teqqaranegh ma kuci ixeddes
1.9. Futukupya n nekwet n bab necci

2. Anegg ah'uzi n pisu. Dinni 3 n timegga:

2.1 Axeddes uh'uzi (Paga i senyal): Netta d ijj n tasmekta n temenyat d amezyan (ca n 3.000 €) i nticc i lbiru nigh i bab necci cnaw ah'uzi n tazeddixt i ijj n erweqt. Asorif-a maci s ughir, maca nteggit xmi ntexs ansebbeb mah'enda adsehwan di taman n tamenziwt. Maca gha unegga mara wa nemsetfaq, ixessa anarr axeddes uh'uzi.

2.2  Kuntratu n erâabun (Contracte d'arres): netta d ijj n reqdar anict n 10% n marra taman n pisu uca nticcit i uh'uzi n azref n tamesghiwt. Temenyat nticcitent xmi nzemel kuntratu n erâabun, dayes ca n iccarrid'en i nzemma ansebbeb. Mara wa nessin ma erbanku adanegh yuc tamrist, h'sen anani ijj ucarred' x tamesghiwt n pisu ghi mara ucinanegh tamrist, ammu wa ntweddari ca temenyat n erâabun.

2.3 Kuntratu n tamesghiwt d uzenzi jaranegh (Contracte privat de compravenda): netta d acrad' jar wenni issaghen d wenni isnuzan u zayes tenayetsen ughir xasen adkemren tamesghiwt d uzenzi. Attas iman ntic 10% n tasekwit n tadart. Mara ijjen zaysen wa ikemmer x wacrad'-a, ixessa adah'en gha ermeh'kama

* IMXEDJIFEN JAR KUNTRATU N TAMESGHIWT D UZENZI D KUNTRATU N ERÂABUN

Kuntratu n tamesghiwt d uzenzi netta d ercighed n tamesghiwt d uzenzi n ijj n erh'ajet nigh n ijj wagra. Kuntratu n erâabun netta d “amsetfeq uâedder” qber i tamesghiwt d uzenzi, wenni issaghen iticc i wenni isnuzan ijj n reqdar n temenyat i tamesghiwt d uzenzi i nexs anegg.

Kuntratu n erâabun di erqanun netta cwait yuâa, x manaya neqqarawem h'sen wa xas tâeddim, mayemmi tawi gha umexbumber d imenghan itawyen gha Ermeh'kama.

Rexzab Aghrim Asepanyu issawar ghi x ijj n talgha n kuntratu n erâabun, maca awar n erqayed (min qqan rquyad' di reh'kamet ensen) issawar x TRATA n talghiwin mxedjafent (x manaya ixessa anexza s reâqer min qqan kuntratut-a):

A. Erâabun n utcari. Netta nticcit cnaw “arcem” qber i gha negg kuntratu n tamesghiwt d uzenzi uca yenni gha yeggen kuntratu wa zemman addewren gha deffar nigh adesbedden kuntratu n erâabun. X manaya, reqdar n temenyat inuca nh'esbit cnaw ijj ussizwa nigh ijj n tasghat n tasekwit ixef nekkes i tamesghiwt d uzenzi.

B. Erâabun n wemnus. Netta nticcit cnaw ad'man ukemmer n kuntratu. Ammu, wenni wa xas itkemmiren itweddara erâabun (mara d wenni ityucin) nigh ixessa antyar tenayen iman (mara d wenni ityeksin).

C. Erâabun n erâuquba. Netta iqqarit Rexzab Aghrim u iqqebber annejj kuntratu. Mara yammu, wenni ititejjan d wenni yucin erâabun, rexdenni itweddara erâabun. Mara wenni ititejjan d wenni iksin erâabun, ixessa atyar tenayen iman.

3.  Anetta tamrist. Xmi gha nawi recwaghed i danegh itetta erbanku (nekwet ennegh, recwaghed n texriset, asedhar wagra, kuntratu n erâabun, dariba i nxeddes x wagra), adanegh yetta ijj usexbar uqiyes ixenni ad'anegh ggen ijj n teâad'it. Teâad'it-a adanegh tyej 10 wessan mah'enda atenghar. Xmi gha neqber ccorot n erbanku, adanegh draghan aneh'd'a di lbiru ak reâdur d bab necci uca atiri tamesghiwt d uzenzi d azmul n tira n tazeddixt. Rexdenni pisu adyiri nnegh.